Este curso comeza un pouco atropelado. Pero comezamos con moitas forzas e moitas ganas. Temos dobre sesión!! Grandes e pequenos teñen unha cita, os maiores con Leo e os pequenos con Lecra. De seguro que vai ser moi divertido. Animádevos a vir, ler e desfrutar!!! Vai ser moi difícil igualar a festa do outro día con César, pero …..
Estamos de festa! Lecras cumpre xa catro aniños, e imos celebralo por todo o alto o mércores 30 de setembro. Estaremos na Piteira desfrutando xuntos da actuación de Cé ao que xa todos coñecedes.
Que non falte ninguén!!!
Despois de moito tempo retomamos a actividade no blog!
Este foi un ano moi completo, cheo de contos, actividades e lecturas compartidas. Temos moito que festexar, pois xa facemos catro anos. Dito así non parece moito, pero se mirades as imaxes da galería de anos anteriores veredes que é un mundo. Os nosos pequenos xa non son tan pequenos, medramos todos xuntos, e as ganas de ler e compartir medraron con eles.
Na inauguración do curso contamos coa presenza de Pablo Díaz que nos fixo cantar, bailar e desfrutar ca música do seu ”Toc Toc”. Xa case a piques de rematar a ilustradora Irene Silva introduciunos no mundo do teatro cun lobo feroz moi especial.
A noite na biblioteca volveu ser espectacular, gracias a Antía Vicente e a Álvaro Fraga por compartir o voso tempo coas nosas familias. Sodes o reflexo de que as educación dos nosos pequenos non corresponde só as escolas e as familias, senón que corresponde a toda a comunidade, e moito máis no rural.
Ao longo deste curso de lectura estivemos arroupados polas profes do CRA. Con Neli e Mónica viaxamos polo mar con Nadarín e coas profes Cati e Mónica desfrutamos dun rebumbio de cores.
Queremos agradecer a colaboración das familias que se implican, das persoas que nos visitan, das profes do CRA e de todos aqueles que ao fin, fan posible que poidamos cumprir catro anos. Esperamos que sexan moitos máis!
Deixamovos no noso facebook un resumo non deste ano como cabería esperar, se nón do curso pasado, no que sabemos que falta xente. De antemán pedirvos diculpas a todos os que non estades, pero é por un único motivo: que saiades guapísimos todos.
Tentaremos que a actividade que levamos a cabo nas redes socias, tanto en Facebook coma en Twitter sexa extensible ao blog. Faremos o que poidamos… e cando consigamos recuperar todalas fotos do curso 2014/2015, faremos outro estupendo vídeo.
Dende o primeiro transmitiunos o seu apoio polo traballo deste Club de lectura. A través dun amigo común tivemos contacto e mostrou o seu interese en que participaramos no programa cultural da TVGalicia, ZigZag Diario.
Para nós, este minireportaxe foi todo un acontecemento. Pertencemos a un pequeno concello, a unhas pequenas escolas, a un mundo rural que na actualidade non esta moi cotizado…e dous minutos e medio na tele foron toda unha revolución!
En canto lle propuxemos achegarse á nosa Piteira non o dubidou, aceptou encantada traer a súa mosca da tele e pasar unha tarde cos nosos nenos. Deste xeito, nesta sesión de +leCRAs, Maria Solar, bióloga, escritora, xornalista e mestra, comentará con todos os que nos acheguemos á Piteira este divertido libro e, seguro que tamén, compartirá algunha das súas experiencias no mundo da televisión!!
Parece que sae o sol, e imos organizar unha cacería….pero que ninguén se asute ou se leve unha impresión equivocada, esta cacería será unha festa de risos, sustos e ruído…de novo a nosa Piteira pasa a ser toda unha cova de diversión!!!
Temos moito atrasado, este foi un trimestre de moito traballo en leCRAs.
Comezou a camiñar a nova sección para os lectores autónomos. Unha sección que non pretende fomentar demasiado esa autonomia, se non, máis ben, fomentar que todos leamos. Nenos e pais, nais, avós…que o libro que traballemos o fagamos todos e todos disfrutemos con novas lecturas.
Así, en +leCRAs lemos “O misterio da casa do Pombal” de Fina Casalderrey, publicado na colección azul do Barco de Vapor e “A pastelería de Dona Remedios” de Agustín Fernandez Paz da editorial Rodeira. Os dous títulos entusiasmaron aos ávidos lectores e despertaron unha gran participación nas sesións conxuntas.
Da man de Susa Herrera cumplimos dous anos de traballo e festexamos o inicio do terceiro curso de leCRAs. Iniciamos as sesións de leCRAs con novos membros na familia (a escola de Bexo comeza a coller ventaxa na participación) e con novos títulos por explorar.
Celebramos Samaín e Nadal, e non faltou o chocolate, os churro, as letras e as cores
Fomos ao Culturgal, onde coñecemos e nos coñeceron, onde compartimos e aprendemos. Foi para leCRAs un pracer, un privilexio e unha fiestra aberta.
Tamén as lectoras-tecedoras do CRAlcetando seguen camiño, desta volta coas “Rapazas de Xan” de Manuel Iglesias Turnes e publicado por Xerais. Para quen queira unirse ainda esta tempo de pasar pola Piteira o 11 de xaneiro e pasar un ratiño á calor dos fios e os libros.
Rematamos na Festa de Nadal do CRA, unha festa feita por todos e para todos, na que leCRAs puxo risas, gaiteiros e teatro coa “Voda do ulga e o piollo”. paga a pena esperar por todos os docuemntos gráficos e audiovisuais que sairon….prometemos incluílos moi pronto!
Na Piteira fai caloriño. Aínda agora, que empeza a chegar o frio seco dos días sen chuvia en Galicia, na Piteira fai caloriño. Cando chega o primeiro neno, co seu pai, nai, avoa…cando entra pola porta a segunda familia…cando se van achegando os que tiñan a encarga de ler esa tarde, os que chegan coa presa de todos os días e por fin sentan no sofá (aínda que sexa naquel da dereita onde se che afunde todo o corpo e quedas nunha posición imposible de mellorar). Cando a Piteira se enche de ruido fai moita caloriña, pese a que a maior parte das veces nos esquecemos de encender a estufa.
A calor sae das ganas con que nos xuntamos, da forza dos nenos ao querer ler e compartir o lido, da ilusión coa que afrontamos cada actividade e do pracer de coñecer novos membros do noso Club.
Desta volta a calor sae dunha invitación, da invitación que recibiu leCRAs para participar no Culturgal. Nun encontro con clubs de lectura que se celebrará o vindeiro 1 de decembro e que para leCRAs supón a mellor das oportunidades para aprender e compartir.
Poderíamos darlle importancia ao feito de que estemos nós entre os sete clubs de lectura invitados de entre todos os que existen en Galicia, poderíamos darlle importancia á repercusión de participar nun evento desta categoría (o máis importante das industrias culturais do pais), ou poderíamos darlle importancia á oportunidade que supón poñer Dodro no mapa da cultura galega….mais queremos darlle importancia á posibilidade que temos de aprender, de falar, de escoitar e descubrir, de debater e de medrar.
Temos leña para rato, a fogata na Piteira segue quentando e aínda que o sofá se afunde un pouco, non deixa de ser dos sitios máis cómodos que coñecemos….
A entrada da nosa Piteira esta chea de follas secas, xa case todos fixemos magosto e as cores castañas chegan a leCRAs: “Macario o dromedario”, “Os ourizos cachos e o gran rio gris” e ata ” O apalpador e a castaña máxica”, pasarán a tarde do mércores con todas as familias que queiran quentarse ao calor dos contos.
A casualidade quixo que hoxe teñamos unha sesión adicada ao mar.
Resulta este un tema increiblemente rico na nosa literatura infantil: peixes distintos que atopan o seu sitio ou cangrexos que tocan o violín nunha fermosa praia xa pasaron fai tempo por leCRAs.
Sempre é bo recordalo e redescubrilo, pero hoxe 13 de novembro semella dos mellores días para viaxar cos Bolechas a Illa de Ons ou aprender a mariscar…hoxe é un gran día para festexar o mar!!!
Cumprimos outro aniño de lecturas compartidas, de busqueda ilusionante da diversión a través dos contos e sobre todo, de xuntanza de familias para traballar con e para os nosos cativos.
Este ano celebrámolo coa especial participación de Susa Herrera na nosa primeira sesión que será unha festa de aniversario cargadiña de música e contos.
Para todos os que fomos leCRAs dende o primeiro día, para os que se foron unindo polo camiño, para as novas caras que queren engadirse a este proxecto e tamén para todo aquel que, simplemente quera compartir esta tarde con nós, estaremos na Piteira a partir das 18.00 horas…entrade sen chamar!!!
leCRAs 